Os camiños, os matos montesíos,
os garridos ensoños, os lindeiros;
os cantos saüdodos, os resíos,
os cómaros, os pinos, os regueiros;
as promesas, os trunfos, os desvíos,
as doces esperanzas, os sendeiros:
todo me dá suidades e triganzas,
todo me trae punxentes memoranzas.
Da xa pasada xunventú, queridos
amigos, e tamén da miña infancia,
para de min vós serdes esquedidos
nada pode o pesar, nada a distancia;
non pode o ferro, non os tempos idos,
meus recordos borrar, miña constancia:
pois neste mundo todo amor fallece,
non esquezades quen vos non esquece.
Sigue a mirada de Pondal cara ao seguinte monolito situado a só uns pasos de distancia.