Moi próxima ao núcleo de Corme Porto e á praia do Osmo por un paseo que mira ao mar (tramo da PR-G 148), é ideal para gozar dun ambiente tranquilo e pouco masificado. Resgardada do vento, ten forma de media cuncha, area branca e fina e ondas moderadas.
Desde aquí tamén se ve este anaco da ría de Corme e Laxe salpicada de bateas de mexillóns e a zona de fondeo no porto de Corme. No verán conta con todos os servizos e baños adaptados.
Desde o paseo marítimo, que recibe o nome do ictiólogo e cartógrafo José María Mosqueira Manso, poderás distinguir ao lonxe o monumento ao Sagrado Corazón de Xesús no alto do monte do Faro.