O Concello de Ponteceso, aproveitando as vacacións de Semana Santa, programa unha ruta de sendeirismo pola costa do municipio. Será o Xoves Santo, día 28 de marzo, e segue a ruta PR-G 148 entre Ponteceso e Corme pola costa, chamada tamén “Camiño da Ribeira”.

O prazo de inscrición finaliza o luns 25 de marzo e os interesados teñen que reservar a súa praza chamando ao teléfono do concello 981714000 ou escribindo un correo a turismoponteceso@ponteceso.net.

Trátase dun percorrido relaxante e ambiental por Ponteceso e o seu ámbito, que mira cara ao río e cara ao mar. Cara ao Anllóns, rico en flora e en fauna, con protección especial, sendo a zona que máis aves migratorias ve pasar de toda Galicia. Cara ao esteiro, é dicir, á unión do río Anllóns e o océano Atlántico, onde se ve a actividade do marisqueo da ameixa e o berberecho. E por último cara ao ancho mar de bateas de mexillóns, de faena de baixura e de paisaxes para inmortalizar.

É unha ruta lineal, de dificultade baixa- media, que percorre unha distancia de 11,3 quilómetros, e para a que se require levar roupa cómoda e deportiva, un calzado apropiado para sendeirismo (a ser posible de Goretex), e unha mochila con auga e chuvasqueiro, por se as inclemencias do tempo o requiren.